აქტივობა 8. მიზეზებისა და ურთიერთდამოკიდებულებების დადგენა, განზოგადება

დამატებითი ინფორმაცია:

აღნიშნული მეთოდის/აქტივობის გამოყენება შესაძლებელია მხოლოდ გარკვეული ცოდნის ბაზაზე. მეთოდი გულისხმობს დავალებების გამოყენებას, რომლებიც იწყება შემდეგი სიტყვებით, მაგალითად: “რატომ ...”, “რასთან არის დაკავშირებული....”, “ახსენით მიზეზი ...”, აგრეთვე მოსწავლეების მიერ სქემების და მოდელების დამოუკიდებლად შექმნის პროცესს.

 

რესურსები:

მიკროსკოპი; მცენარეული, ცხოველური და სოკოს უჯრედების პრეპარატები; მცენარეული, ცხოველური და სოკოს უჯრედების პლაკატები და ფოტოები.

 

შესწავლის საგანი/მიზნები:

მოსწავლეებმა უნდა ისწავლონ, რომ:

  • უჯრედი ორგანიზმის სტრუქტურულ-ფუნქციური და განვითარების ელემენტარული ერთეულია;
  • სიცოცხლის ორგანიზაციის ქსოვილური დონე უფრო მაღალია, ვიდრე უჯრედული.

 

მასწავლებლის სავარაუდო აქტივობები:

მასწავლებელი:

  • სვამს კითხვას: 
  • რატომ ითვლება უჯრედი ორგანიზმის სტრუქტურულ-ფუნქციურ და განვითარების ელემენტარულ ერთეულად?
  • სთხოვს მოსწავლეებს, დააკავშირონ უჯრედის ფორმა შესასრულე­ბელ ფუნქციასთან უჯრედის შესწავლის შედეგად მიღებულ ცოდნაზე დაყრდნობით;
  • გამოსახავს სიცოცხლის ორგანიზაციის დონეებს სქემის სახით და სვამს კითხვას: რატომ თვლით, რომ სიცოცხლის ორგანიზაციის ქსოვილური დონე უფრო მაღალია ვიდრე უჯრედული?
  • მიკროსკოპის, პლაკატების ან ფოტოების საშუალებით აჩვენებს მოსწავლეებს არა მხოლოდ ფოთლის, არამედ მცენარის სხვა ორგანოების უჯრედებს;
  • ცნება “სტრუქტურული ერთეული”-ს ასახსნელად იყენებს მარტივ ანალო­გიებს, მაგალითად, სახლის სტრუქტურული ერთეულია - აგური და სხვ.

 

მოსალოდნელი შედეგები:

მოსწავლეები:

  • სხვადასხვა ორგანიზმის უჯრედების შესწავლის შემდეგ გამოიტანენ დასკვნას, რომ მცენარეული და ცხოველური ორგანიზმი შედგება უჯრედებისაგან;
  • დაადგენენ მიზეზ-შედეგობრივ კავშირებს; კანონზომიერების დადგენის, დასკვნების გამოტანის საფუძველზე განივითარებენ ანალიტიკურ აზროვნებას.