აქტივობა 3. აბა, გამოიცანი!
აქტივობის შესახებ:
აქტივობა ხელს უწყობს კრიტიკული მოსმენისა და კრიტიკული ანალიზის უნარ-ჩვევების განვითარებას.
აქტივობის მიზნები:
- მოსმენის უნარის განვითარება;
- კრიტიკული ანალიზის უნარ-ჩვევების განვითარება.
რესურსები:
ტექსტების აუდიოჩანაწერები.
აქტივობის ორგანიზების ფორმა:
ინდივიდუალური.
აქტივობის აღწერა:
მასწავლებელი მოსწავლეებს ასმენინებს მოკლე, კონკრეტული კონტექსტიდან ამოღებულ ნაწყვეტს, მაგალითად, დიალოგის ან დისკუსიის ნაწილს, საუბრის ფრაგმენტს. შინაარსის, საუბრის სტილის, ენობრივ-გრამატიკული სტრუქტურისა და სხვა ენობრივი ნიშნების მიხედვით მოსწავლეებმა უნდა გამოთქვან ვარაუდები, თუ ვისთვისაა გამიზნული მოსმენილი ტექსტი / რა აუდიტორიისთვისაა გამიზნული, აღადგინონ კონტექსტი, განსაზღვრონ საკომუნიკაციო სიტუაცია. მოსწავლეებმა მოსმენილი ტექსტის მონაცემებზე დაყრდნობით უნდა დაასაბუთონ, რატომ ფიქრობენ ასე, რა მინიშნებას ეყრდნობიან აზრის გამოთქმისას.
შეფასება:
აქტივობით ფასდება, შეუძლია თუ არა მოსწავლეს:
- ენობრივ-გრამატიკულ ფორმებზე დაკვირვების გზით აუდიტორიის განსაზღვრა;
- კრიტიკული მოსმენა.
მეთოდური მითითება:
მასწავლებელმა უნდა გაითვალისწინოს, რომ მოსასმენი მასალა არ იყოს ძალიან ნათელი, ანუ იძლეოდეს ინტერპრეტაციის საშუალებას. წინააღმდეგ შემთხვევაში, აქტივობა უინტერესო გამოვა.